ጠቅላይ ሚንስትር ክቡር ዶ/ር አብይ አህመድ በቫቲካን የሚገኘው ታሪካዊው የኢትዮጲያ ኮሌጅን አደነቁ

ይህ ኮሌጅ በዚህ ስፍራ መገኘቱ የአገራችንን ታላቅነት እና የሕዝቦቿዋ እምነት መገለጫ ነው። ከርዕሰ ሊቃነ ጳጳሳት ጋር እንዲሁም ደግሞ ከቅድስት መንበር ጋር ያለንን ቅርበትና ግንኙነት ማሳያ ነው።
የኢትዮጲያ ፌደራላዊ ዴሞክራሲያዊ ሪፐብሊክ ጠቅላይ ሚንስትር ዶ/ር አብይ አህመድ በጥር 13 ቀን 2011 ዓ.ም በቫቲካን ውስጥ የሚገኘውን የኢትዮጵያ ኮሌጅ (የቅዱስ እስጢፋኖስ ገዳም) ጎብኝተዋል። የኢትዮጲያ ካቶሊካዊት ቤተ ክርስቲያን ብጽዕን ጳጳሳትና ካህናት ከኢትዮጵያ በመጓዝ አቀባበል አድርገዋል።
ብጽዕ ካርዲናል ብርሃነየሱስ ሊቃነ ጳጳስት ዘካቶሊካዊያን የኢትዮጲያ ካቶሊካዊያን ጳጳሳት ጉባሄ ፕሬዚዳንት፣ የአዲግራት ሀገረ ስብከት ጳጳስ አቡነ ተስፋስላሴ መድኅን፣ የመቂ ሀገረ ስብከት ጳጳስ አቡን አብርሃ ደስታ፣ የጅማ ቦንጋ አገረ ስብከት ጳጳስ አቡነ ማርቆስ ገብረመድኅን፣ የሆሳህና አገረ ስብከት ጳጳስ አቡነ ስዩም፣ የኢትዮጲያ ካቶሊክ ቤተ ክርስቲያን ጠቅላይ ጽሕፈት ቤት የሐዋሪያዊ ሥራ አገልግሎት መምሪያ ኃላፊ የሆኑት ክቡር አባ ተሾመ፣ የአዲስ አገረ ስብከት ሐዋሪያዊ አገልግሎት መምሪያ ጽሕፈት ቤት ኃላፊ የሆኑት ክቡር አባ ጴጥሮስ በርጋ እና በርካታ የኢትዮጲያ ኮሌጅ ኢትዮጲያዊያን እና ኤርትራዊያን ካህናት እንዲሁም ተጋባዥ እንግዶች በተገኙበት ለክቡር ጠቅላይ ሚንስትር ዶክተር አብይ አህመድ እና ከእርሳቸው ጋር አብረው ለነበሩ ከፍተኛ የመንግስት ሃላፊዎችን ገዳሙን ካስጎበኙ በውሃላ ውይይት አድርገዋል።
ቫቲካንን በመወከል በጉብኝቱ የአቀባበል ስነ-ስረዓት ላይ የተገኙት በቅድስት መንበር የምስራቃዊያን አብያተ ክርስቲያናትን ጉዳይ በበላይነት የሚከታተለው ጽሕፈት ቤት ዋና ጸሐፊ የሆኑት ብጽዕ ካርዲናል ሌዎናርዶ ሳንዲሪ ጨምሮ የቀድሞ በኢትዮጲያ የቫቲካን አምባሳደር የነበሩ ብጽዕ አቡነ ቶማሲ ሲልቫኖ ተገኝተዋል።
በግንኙነቱ ወቅት በቅድሚያ የእንኳን ደህና መጣችሁ መልእክት ያስተላለፉት ብጽዕ ካርዲናል ብርሃነየሱስ ሊቃነ ጳጳስት ዘካቶሊካዊያን የኢትዮጲያ ካቶሊካዊያን ጳጳሳት ጉባሄ ፕሬዚዳንት በወቅቱ እንደ ገለጹት “ዛሬ በዚህ ታሪካዊ ቦታ፣ አጋጣሚ እና ቀን እግዚአብሔር አገናኝቶን እርሶን በክብር ለመቀበል በመታደላችን ታላቅ ደስታ ይሰማናል። እንዲሁም እርሶ ይህንን አጋጣሚ በመጠቀም በዚህ ታሪካዊ ቦታ በቅድስት መንበር ሥር በቫቲካን ውስጥ በሚገኘው የኢትዮጲያ ኮሌጅ እና ገዳም (ደብረ ቅዱስ እስጢፋኖስ) ለመጎብኘት የቀረበሎትን ጥሪ አክብረው በመምጣቶ በኢትዮጲያ ካቶሊካዊት ቤተ ክርስቲያን እና በኢትዮጲያ የካቶሊክ ቤተ ክርስቲያን የጳጳስት ጉባሄ፣ እንዲሁም ከኢትዮጲያ እና ከኤርትራ የተውጣጡ በኮሌጁ ካህናት እና በራሴ ስም እንኳን ደህና መጡ ለማለት እወዳለሁ” ብለዋል። በወቅቱ ብጽዕ ካርዲናል ብርሃነየሱስ ሊቀጳጳሳት ዘካቶሊካዊያን የኢትዮጲያ ካቶሊካዊያን ጳጳሳት ጉባሄ ፕሬዚዳንት ያስተላለፉን መልእክት ሙሉ ይዘት እንደሚከተለው ይነበባል።
ክቡር የኢትዮጲያ ጠቅላይ ሚንስትር ዶክተር ዓብይ አህመድ
ዛሬ በዚህ ታሪካዊ ቦታ፣ አጋጣሚ እና ቀን አገናኝቶን እርሶን በክብር ለመቀበል በመታደላችን ታላቅ ደስታ ይሰማናል። እንዲሁም እርሶ ይህንን አጋጣሚ በመጠቀም በዚህ ታሪካዊ ቦታ በቅድስት መንበር ሥር በቫቲካን ውስጥ በሚገኘው የኢትዮጲያ ኮሌጅ እና ገዳም (ደብረ ቅዱስ እስጢፋኖስ) ለመጎብኘት የቀረበሎትን ጥሪ አክብረው በመምጣቶ በኢትዮጲያ ካቶሊካዊት ቤተ ክርስቲያን እና በኢትዮጲያ የካቶሊክ ቤተ ክርስቲያን የጳጳስት ጉባሄ፣ እንዲሁም ከኢትዮጲያ እና ከኤርትራ የተውጣጡ በኮሌጁ ካህናት እና በራሴ ስም እንኳን ደህና መጡ ለማለት እወዳለሁ።
ዛሬ የዚህን የኢትዮጲያ ኮሌጅ ታሪክ በሰፊው ለመተንተን ጊዜ እና ሰዓት ስለማይፈቅድልን የዚህን የኢትዮጲያ ኮሌጅ ታሪክ በአጭሩ ለመግለጽ ይህ በቫቲካን እንብርት ውስጥ የሚገኘው ብቸኛው የኢትዮጲያ ኮሌጅ እንደ ሆነና በታሪክ ውጣ ውረድ ውስጥ ሥራውን ሳያቋርጥ ይሄው እስከ ዛሬ ድረስ ተግባሩን በማከናወን ላይ ይገኛል። ከእርሶ በፊት በተለያዩ ወቅቶች የነበሩ የኢትዮጲያ የአገር መሪዎች እና የሃይማኖት አባቶች ይህንን ታሪካዊ የኢትዮጲያ ኮሌጅ ጎብኝተዋል።
ይህ ኮሌጅ በዚህ ስፍራ መገኘቱ የአገራችንን ታላቅነት እና የሕዝቦቿን እምነት መግለጫ ነው። ከርዕሰ ሊቃነ ጳጳሳት ጋር እንዲሁም ደግሞ ከቅድስት መንበር ጋር ያለንን ቅርበትና ግንኙነት ማሳያ ነው።
ክቡር ጠቅላይ ሚንስትር ዶክተር አብይ አህመድ ዛሬ በመካከላችን ተገኝተው በክብር ልንቀበሎት ከፊቶ የሚታዩት ካህናት ኢትዮጲያዊያን እና ኤርትራዊያን ናቸው። ያለፈው ታሪካችን እንዳለ ሆኖ እስከ ዛሬ ድረስ እነዚህ ካህናት ያለምንም ልዩነት በአንድነት መንፈስ ለሁለቱ አገራት እና ሕዝቦች ሲጸልዩ እና ሲቀድሱ ቆይተው ይኸው አሁን ሁለቱም አገራት ወደ ሰላም መድረክ ተመልሰዋል። ይህንን ብርታት እና የአንድነት መንፈስ የሰጠን እግዚኣብሔር ስሙ ለዘለዓለም የተመሰገነ ይሁን። እርሶም በዚህ ጉዳይ ላይ የአንበሳውን ድርሻ እንደ ተጫወቱ ይታወቃል፣ ለዚህ ልፋቶ እግዚብሔር ይስጥልን እያልኩኝ ለተገኘው ስኬት ደግሞ እንኳን ድስ አሎት ለማለት እፈልጋለሁ።
በዚህ አጋጣሚ በሁለቱ አገራት እና ሕዝቦች መካከል የተጀመረው ግንኙነት በበለጠ ዳብሮ ወደ ቀድሞ ሰላምና ፍቅር ተመልሰን ያለፈውን በይቅርታ አልፈን፣ አዲስ ታሪክ እንድንጀምር መንገድ ስለከፈቱልን እናደንቆታለን እናመስግኖታለንም።
በአገር ውስጥ እና ከጎረቤቶቻችን ጋር ሁሉ ለአገራችን እንድገት ለሕዝቦቿ ብልጽግና ሰላም እጅግ ወሳኝ በመሆኑ እንደ ጀመሩት ሁሉ ኃይል ከመጠቀም ይልቅ “ይቅርታ እና ፍቅር ያሸንፋል” የሚለውን አቋሞን መሰረት በማድረግ ኢትዮጲያ እና ሕዝቦቿን ወደ ልማትና እድገት ከፍታ እንደ ሚመሩዋት እንተማመናለን።
እግዚኣብሔር ኢትዮጲያን እና ሕዝቦቿን ይባርክ!
ብጽዕ ካርዲና ብርሃነየሱስ
ሊቀ ጳጳስት ዘካቶሊካዊያን
የኢትዮጲያ ካቶሊካዊያን ጳጳሳት ጉባሄ ፕሬዚዳንት
ጥር 13 ቀን 2011 ዓ.ም
የኢትዮጲያ ኮሌጅ
ቫቲካን

Leave a Reply

Your email address will not be published. Required fields are marked *